გვარდიოლა ტურეს მისტირის და ფაბრეგასს არ ეშვება - 20 ივლისში 2010

დღეს, ესპანეთის ჩემპიონმა "ბარსელონამ” ახალი სეზონისთვის მზადება დაიწყო. მას შემდეგ, რაც კატალონიური კლუბის ფეხბურთელებმა სამედიცინო შემოწმება გაიარეს, მთავარი მწვრთნელი, პეპ გვარდიოლა ჟურნალისტების წინაშე წარსდგა და მათ მიერ დასმულ არაერთ მნიშვნელოვან კითხვას უპასუხა. გვარდიოლამ ისაუბრა გუნდიდან წასულ ფეხბურთელებზე, ახალწვეულებზე და რა თქმა უნდა სესკ ფაბრეგასის შესაძლო ტრანსფერზე. კატალონიელი ფეხბურთელის შესახებ გვარდიოლამ შემდეგი კომენტარი გააკეთა: "ძალიან კარგად მესმის, რომ "არსენალს” არ სურს ასეთი მოთამაშის გაშვება. სესკი შესანიშნავი ფეხბურთელია და გვინდა, რომ მან მომდევნო სეზონი ჩვენს გუნდში გაატაროს. ყველაფერი დამოკიდებულია კლუბის ახალ ტექნიკურ დირექტორზე, ანდონი სუბისარეტაზე. როგორც პრეზიდენტმა როსელმა განაცხადა, ფაბრეგასის ხელში იაფად ჩაგდება არ გამოვა, მაგრამ ჩვენ გვსურს ამ ფეხბურთელის შეძენა”. გვარდიოლას ამ კომენტარს მადრიდული AS ავრცელებს.
კატალონიელმა მწვრთნელმა ისაუბრა გუნდიდან წასული ფეხბურთელების შესახებ. როგორც აღმოჩნდა, მას არ სურდა იაია ტურესა და დმიტრო ჩიგრინსკის გაშვება, მაგრამ პირველმა მათგანმა ინგლისს საკუთარი სურვილით მიაშურა, მეორე კი მშობლიურ უკრაინაში კლუბის ფინანსური ინტერესების გამო დაბრუნდა. "ტურეს წასვლა ჩვენთვის დიდი დანაკლისია. კარგად მესმის, რომ მისი დონის ფეხბურთელს ბევრი სათამაშო დრო სჭირდება, განსაკუთრებით მნიშვნელოვან მატჩებში, მაგრამ მე მისთვის გარანტიების მიცემა არ შემეძლო. ტურე შესანიშნავი ფეხბურთელია, რომელთანაც ძალიან კარგი ურთიერთობა მაქვს, მაგრამ მან თავად ისურვა წასვლა. ვწუხვარ ამის გამო, მაგრამ იმედი მაქვს, რომ იგი "სიტიში” იმას იპოვნის, რასაც ეძებს” – გვარდიოლას ამ კომენტარს უკვე "ბარსას” ოფიციალური ვებ-გვერდი ავრცეელბს.
ტურეს გუნდიდან წასვლის შემდეგ კატალონიელთა დღის წესრიგში ნახევარმცველის შეძენის საკითხი დადგა. ფაბრეგასის ყიდვის შემთხვევაში გვარდიოლა მეტი ნახვარმცველის დამატებას აღარ აპირებს, რადგან ტურეს წასვლით გამოწვეული სიცარიელი ამით აღმოიფხვრება, მაგრამ ვინაიდან "არსენალთან” მოლაპარაკებები არცთუ იმედისმომცემად მიმდინარეობს, კატალონიელები ალტერნატიულ ვარიანტებზეც მუშაობენ. El Mundo Deportivo-სა და France Football-ის ცნობით, "ბარსა” საყრდენ ნახევარმცველს საფრანგეთის ჩემპიონატში ეძებს. თუ კატალონიურ და ფრანგულ გამოცემებს დავუჯერებთ, გვარდიოლამ თვალი "მარსელის” საყრდენ ნახევარმცველს, შარლ კაბორეს დაადგა. მის გარდა კატალონიელი სპეციალისტის თვალთახედვის არეში მოხვდნენ ალუ დიარა ("ბორდო”), ეტიენ კაპუე და მუსა სისოკო (ორივე "ტულუზა”).
დავუბრუნდეთ "ბარსელონადან” წასულ ფეხბურთელებს. კიდევ ერთი მოთამაშე, რომელმაც კატალონიური კლუბი გვარდიოლას სურვილის საწინააღმდეგოდ დატოვა, დმიტრო ჩიგრინსკია. როგორც იცით, ერთი წლის წინათ უკრაინელი მცველი "ბარსელონამ” 25 მილიონი ევროს სანაცვლოდ სწორედ გვარდიოლას დაჟინებული მოთხოვნით შეიძინა. ყოფილი შეგირდის "შახტარში” დაბრუნებაზე "ბარსას” მწვრთნელი შემდეგ კომენტარს აკეთებს: "ვიცი, რომ ისე გამოვიდა, თითქოს მატყუარა ვარ. ჩიგრინსკის ვუთხარი, რომ იგი კლუბში დარჩებოდა, მაგრამ მიუხედავად იმისა, რომ მე მაქვს ჩემი ხედვები, კლუბის ინტერესები მაინც ყველაფერზე მაღლა დგას. პრეზიდენტმა მითხრა, რომ საჭირო იყო ჩიგრინსკის გაყიდვა”.
ტურესა და ჩიგრინსკისთან ერთად "ბარსელონა” და საერთოდ ევროპული ფეხბურთი ფრანგმა ვარსკვლავმა ტიერი ანრიმაც დატოვა, მაგრამ მასზე რომ გვარდიოლა დიდ იმედებს აღარ ამყარებდა, ეს გასულმა სეზონმაც კარგად დაგვანახა. "დიდი სიამოვნება იყო ანრისთან ერთად მუშაობა. "ბარსელონამ” მადლობა უნდა გადაუხადოს ყველა იმ ფეხბურთელს, რომელსაც ამ კლუბში უთამაშია. ტიერი ანრისთან კარგი მოგონებები გვაკავშირებს და იმედი მაქვს, რომ მომავალში მას ყველაფერი კარგად ექნება” – აცხადებს გვარდიოლა.
კატალონიელთა მესაჭემ, რა თქმა უნდა, კომენტარი გააკეთა კლუბის ახალწვეულებზეც: "დავიდ ვილიას შეუძლია ითამაშოს როგორც თავდასხმის ცენტრში, ასევე ფლანგზე. იგი ყოველთვის მომართულია გოლების გასატანად და ყოველთვის კარგად ახერხებს თავისუფალი სივრცეების მოძებნას”. რაც შეეხება ადრიანო კორეიას, მის შესახებ გვარდიოლამ შემდეგი განაცხადა: "მისი შეძენა გუნდს სასიკეთოდ წაადგება. როდესაც ალვეშს თამაში არ შეეძლება, ან მისი დასვენება მოგვიწევს, ბრაზილიელს ადრიანო შეცვლის, რადგან არ მინდა ამ პოზიციაზე პუიოლი თამაშობდეს. გარდა ამისა, ჩემი არჩევანი ადრიანოზე შეჩერდა იმიტომ, რომ არ მსურდა მხოლოდ მარჯვენა ფლანგზე მოთამაშე ფეხბურთელის შეძენა”.
ბოლოს კი შემოგთავაზებთ გვარდიოლას კომენტარს ზლატან იბრაჰიმოვიჩთან დაკავშირებით. როგორც იცით, ბოლო დროს აქტიურად ვრცელდება ხმები შვედი ფორვარდის კატალონიიდან აბარგების შესახებ: "იბრაჰიმოვიჩის დონის ფეხბურთელებმა საკუთარ მომავალთან დაკავშირებით გადაწყვეტილება თავად უნდა მიიღონ”.