საათებიღა რჩება. მსოფლიოს დიდი ფინალის
მოლოდინში გაყავს დრო. ხალხი ესპანელთა და ჰოლანდიელთა შემადგენლობებს
სწონის, შანსებს აფასებს, ერთმანეთს ეკამათება და საღამოსთვის ლუდის
მომარაგებაზე ფიქრობს. განსაკუთრებული სჯა-ბაასი მიდის ორი ნაკრების
ნახევარდაცვის შედარებაზე. ამბობენ, ვინც ცენტრს დაიპყრობს თამაშიც იმას
დარჩებაო. ნახევარმცველები კი ორივე გუნდს მშვენიერი ჰყავს - ესპანელებს
ინიესტა, ხავი-ხაბი, ბუსკეტსი და ზედაც ფაბრეგასი (ეს ალბათ
სათადარიგოებში), ჰოლანდიელებს კი სნეიდერის, ვან ბომელის და ვან დერ
ვაარტის იმედი აქვთ.
მაგრამ თუ ფინალს მიმდგარი მუნდიალის ერთ-ერთ
საუკეთესო მოთამაშეს, ხავის დავუჯერებთ, დღეს იოჰანესბურგის "სოკერს სიტი”
არ იქცევა მხოლოდ ნახევარმცველთა ბრძოლის ველად. ცენტრის მოგება ბევრს
ნიშნავს, მაგრამ არა ყველაფერსო - ამბობს ესპანეთის ნაკრების ტვინი და
გამთამაშებელი.
"ნახევარდაცვაში უპირატესობის მოპოვება, რა თქმა
უნდა ძალიან მნიშვნელოვანია და ცენტრის დაპყრობით ნახევარ საქმეს
შევასრულებთ, მაგრამ არანაკლებ მნიშვნელოვანია დაცვის შეუცდომლად თამაში
და თავდასხმის კარგად კონტროლირებადი აგრესია. "ფურია როხა” არაა მხოლოდ
კარგ ნახევარმცველთა კრებული. ესაა თანაბრად ძლიერად დაბალანსებული
11-კაციანი გუნდი, რომელიც ბოლო სამნახევარი წელი დამაჯერებლად თამაშობს
და იმსახურებს უმაღლეს ჯილდოს. კი ბატონო, ამ ჩემპიონატზე ჩვენ არ
გაგვაქვს ბევრი გოლი, თუმცაღა აურაცხელ მომენტს ვქმნით და შედეგიანობა
წესით გაცილებით მაღალი უნდა გვქონოდა. იმედი მაქვს, ამ საღამოს მაინც
გავაუმჯობესებთ საგოლე შანსების გამოყენების პროცენტს.”
ფინალის წინ ხავი მშვიდად გამოიყურება, აი,
ესპანელთა კაპიტან იკერ კასილიასს კი - ასე ჩანს, რომ - ნერვები უხტის:
"ესპანეთის ნაკრებმა თავისი სტილი შექმნა და ორი წლის წინ ლამაზად მოიგო
ევროპის ჩემპიონატი. მერე ჩვენ დიდი რუდუნებით მოვდიოდით ამ დღემდე და აი,
ახლა ფინალი უნდა ვითამაშოთ. ძალიან ვნერვულობ ცხოვრების უმნიშვნელოვანესი
თამაშის წინ. ასე მგონია, მუცელში პეპლები მიფართხალებენ.”