ვისენტე დელ ბოსკე: “ჩემპიონობას ესპანეთიც იმსახურებს და ჰოლანდიაც” - 10 ივლისში 2010

ესპანეთის ნაკრების მთავარ მწვრთნელად დანიშვნის დღესვე, ვისენტე დელ ბოსკე გულშემატკივრებს "ფურია როხას” ახალ-ახალ წარმატებებს დაჰპირდა. როგორც არ უნდა დამთავრდეს 11 ივლისის ფინალი, მადრიდის "რეალის” ყოფილმა ფეხბურთელმა და მწვრთნელმა, მიცემული სიტყვა უკვე შეასრულა – დელ ბოსკეს მეთაურობით, პირენეელთა უპირველესმა გუნდმა 32 მატჩიდან 30 მოიგო, ხვალ კი, მუნდიალის გადამწყვეტ შეხვედრას ჩაატარებს...

- ესპანეთის ნაკრებს, მუნდიალის მონაწილეთაგან საუკეთესო თუ არა, ერთ-ერთი საუკეთესო შემადგენლობა ნამდვილად ჰყავს. თქვენც ამ მომენტს მიიჩნევთ წარმატების უმთავრეს საწინდრად?
- ჩვენი წარმატების ძირითადი განმსაზღვრელი მომენტი სიმშვიდე და ურთიერთდახმარებაა. ჩვენ დასახული მიზნისკენ მივდივართ და ამ გზიდან ვერაფერმა გადაგვახვევინა. არც ერთ მომენტში კონცენტრაცია არ დაგვიკარგავს, წონასწორობა შევინარჩუნეთ, რასაც ესპანეთში არსებულმა მდგომარეობამაც ხელი შეუწყო. ჩვენს ქვეყანაში სპორტს უდიდესი ყურადღება ექცევა, რამაც სასიკეთო ნაყოფი გამოიღო. ფეხბურთს თავი რომ დავანებოთ, კალათბურთში მსოფლიოსა და ევროპის ჩემპიონები ვართ, ჩოგბურთელები კი დევისის თასს ფლობენ. ნუ მიწყენენ სპორტის სხვა, თუნდაც ძალიან პოპულარული სახეობის წარმომადგენლები, მაგრამ პრაქტიკულად ნებისმიერი ესპანელისთვის, ფეხბურთი მაინც ნომერ პირველ სახეობად რჩება და რაოდენ სასიხარულოა, რომ ბოლო დროს, "ფურია როხა” გულშემატკივრებს სულ უფრო და უფრო ახარებს. მსოფლიოს თასის მოპოვებამდე ერთი ნაბიჯიღა გვაკლია. ესპანური ფეხბურთისთვის გადამწყვეტი მომენტი დადგა, ამასთან, ძალიან ძნელია, ჩვენ ხალხს მოგებას დავპირდე, მაგრამ გამარჯვებისთვის არაფერს რომ არ დავიშურებთ, საამისო პირობას ვდებ. თქვენ კითხვას რაც შეეხება, ცხადია, მაღალი დონის შემსრულებლები გვყავს. ამის გარეშე, წარმატებაზე ფიქრი შეუძლებელია. ერთ მოსაზრებას კი ვერ დავეთანხმები. ბევრის აზრით, "ფურია როხას” კარგ თამაშს "რეალისა” და "ბარსელონას” მოთამაშეები განსაზღვრავენ. ამ ადამიანების არგუმენტები განსაკუთრებით მას შემდეგ გაძლიერდა, რაც ნახევარფინალში გერმანიასთან სასტარტო შემადგენლობაში კასტილიური და კატალონური გრანდების 10 ფეხბურთელი დავაყენე და მხოლოდ ხუან კაპდევილა წარმოადგენდა "ვილიარეალს”. მე კი ჩემი მიდგომა მაქვს – ბევრი ესპანური კლუბი მუშაობს ნაკრების საკეთილდღეოდ, მათი წვლილი დიდია "ფურია როხას” საერთო წარმატებაში. ამ საქმეში უამრავი ადამიანია ჩართული, რომელთა სახელები, ხშირად, ფართო საფეხბურთო საზოგადოებისთვის უცნობი რჩება.
- ჰოლანდიელების ყველაზე ძლიერ მხარედ რას მიიჩნევთ?
- ჰოლანდიელები, ტრადიციულად ძალიან ძლიერები არიან და შემადგენლობაში ყოველთვის ჰყავთ მსოფლიო დონის მოთამაშეები. ესპანეთის მსგავსად, ნიდერლანდელებიც არასდროს ყოფილან მუნდიალის გამარჯვებულები, ამიტომაც, მათაც განსაკუთრებული მოტივაცია ამოძრავებთ. ჩემი ღრმა რწმენით, ჩემპიონობას ჩვენც ვიმსახურებთ და ბერტ ვან მარვიიკის გუნდიც. "ფურია როხა” კი გააფთრებით იბრძოლებს. შვეიცარიელებთან წაგებამ გული გვატკინა და მას შემდეგ მოყოლებული, დასახული მიზნისკენ ჯიუტად მივიწევთ. საკუთარი ძალის რწმენა გვაქვს და ფინალში იმედადაც ჩვენი ოსტატობა გაგვყვება და არა რვაფეხა პაულის წინასწარმეტყველება.
- ფერნანდო ტორესს სასტარტოში დააყენებთ?
- ფერნანდო კარგი ბიჭი და "ფურია როხას” მნიშვნელოვანი ფეხბურთელია, მაგრამ ჯერჯერობით ვერ გეტყვით, 11 ივლისს იგი თამაშში დასაწყისიდან ჩაერთვება თუ არა. მასთან გერმანიასთან მატჩის წინ არ მისაუბრია, თუმცა, დარწმუნებული ვარ, მისი სათადარიგოთა სკამზე დატოვებას გაგებით შეხვდა.