ესპანეთისა და საფრანგეთის 19-წლამდელთა ნაკრებები ევროპის ჩემპიონატის
ფინალში არიან. ლუის მილიას ესპანეთმა იოლად დაძლია ნახევარფინალური
ბარიერი, ინგლისის ნაკრები სერხიო კანალესის შოუს წყალობით 3:1 დაამარცხა.
"ფურია როხიტამ" ჯგუფური ეტაპი სამივე გამარჯვებით დაასრულა, ინგლისელები
კი სასწაულებრივ გავიდნენ ნახევარფინალში. ამიტომაც მატჩის ფავორიტი
მილიას გუნდი იყო. "როხიტამ" უპირატესობა მე-12 წუთზევე დაამტკიცა, როცა
ნაკრების ლიდერმა სერხიო კანალესმა მარჯვენა ფლანგზე გაინავარდა და
საჯარიმოს მარცხენა კუთხეში დანი პაჩეკოს უპასა. "ლივერპულის" ახალგაზრდა
ფორვარდმა კი არ დაახანა და ძლიერი დარტყმით ანგარიში გახსნა. ეს პაჩეკოს
მე-4 გოლი იყო ევროპის ჩემპიონატზე.
მეორე გოლი კი "როხიტამ"
დიდი გუნდის სტილში გაიტანა, კანალესმა ბურთი ქუსლით დაუგდო კეკოს,
რომელმაც ბრწყინვალე შესვლა განახორციელა, კაპიტანმა აჯობა ყველას, მათ
შორის ინგლისელთა გოლკიპერს და ანგარიში 2:0 გახადა. ინგლისელებმა
გაიბრძოლეს, 37-ე წუთზე შეცვლაზე შემოსულმა ჯონ ბოსტოკმა შორეული დარტყმით
დაამწუხრა ალექსი - 2:1.
მატჩის ინტრიგას წერტილი 57-ე წუთზე
დაესვა, როცა ესპანელებმა დიდებულად გაითამაშეს საჯარიმო, ტიაგო
ალკანტარამ ბურთი თავზე გადაუგო ცოცხალ კედელს, კანალესმა კი მეკარეს
დაასწრო და ერთი შეხებით გაიტანა. ეს "რეალის" ახალწვეულის პირველი გოლია
ევროპის ჩემპიონატზე. ინგლისელებთან მატჩში მან გოლი და ორი საგოლე პასი
მიითვალა.
მოგვიანებით, მეორე ნახევარფინალში ტურნირის
მასპინძელმა საფრანგეთის 19-წლამდელთა ნაკრებმა მძიმე ბრძოლაში დაამარცხა
ხორვატი თანატოლები და ფინალში თამაშის უფლება მოიპოვა. მატჩში, რომელშიც
თავიდან ბალკანელები იგებდნენ, გამარჯვების გოლი შორეულ დაბალ კუთხეში
ეფექტური "მოჭრილი" დარტყმით ბაკამბუმ გაიტანა.
